حصاوي بلا مشاكل

حصاوي جالس بالمقهي يدخل عليه رجل من معارفه‏)‏ الرجل‏:‏ مالك متضايق ليه؟ حصاوي‏:‏ عندنا مشاكل كتيرة‏.‏ الرجل‏:‏ مش مشكلة‏.‏ حصاوي‏:‏ إزاي بقي؟ الرجل‏:‏ كل المشاكل بتتحل‏.‏ حصاوي‏:‏ تتحل إزاي؟ الرجل‏:‏ بأي حل‏.‏ حصاوي‏:‏ وايه هو أي حل؟ الرجل‏:‏ هنعرفه لما يحصل ما تستعجلش‏.‏ العجلة في الندامة‏.‏ حصاوي‏:‏ لما نقعد ساكتين والمشكلة هتفضل تكبر‏।‏ الرجل‏:‏ ما تكبر دي سنة الحياة‏.‏ العيال بتكبر‏,‏ والزرع بيكبر والبيوت بتكبر‏.‏ حتي الأفكار بتكبر‏.‏ حصاوي‏:‏ المشكلة لما تكبر بتتحول لكارثة‏।. الرجل‏:‏ يتهيأ لك‏..‏ لأنك بمرور الوقت بتتعود علي المشكلة‏,‏ ولما تكبر وتبقي كارثة ما بتاخدش بالك أنها كبرت‏.‏ حصاوي‏:‏ وليه ما نفكرش في حل لمشاكلنا؟ الرجل‏:‏ أنت مش فاهم يا حصاوي‏.‏ أهم مشكلة عندنا هو التفكير نفسه‏,‏ والتفكير بالذات أكتر مشكلة ما لهاش حل‏,‏ أو بمعني أصح حلها الوحيد أننا ما نفكرش ما هو لما ما نفكرش مش هنعمل حاجة في أي مشكلة‏.‏ مش معني أننا ما نعملش حاجة أن المشكلة مش هتتحل‏.‏ حصاوي‏:‏ مش فاهمك‏।‏ هتتحل لوحدها؟ الرجل‏:‏ أيوه‏.‏ لأن كل شئ له نهاية ولا دايم إلا وجه الله عز وجل‏.‏ حصاوي‏:‏ يعني عندنا مشكلة اقتصادية‏,‏ علينا ديون متلتلة والموارد مش كافية‏।‏ الرجل‏:‏ خليك في نفسك ومشكلتك‏,‏ هو أنت مسئول؟ دي شغلة المسئول‏.‏ حصاوي‏:‏ أنا نفسي مشاكلي أكتر من مشاكل البلد‏,‏ عاطل مش لاقي شغل وماعنديش مورد أكل منه وعليا ديون برضه ومش فاهم حاجة من اللي بتحصل حواليا . الرجل‏:‏ لما تقعد كتير عاطل هتتحل أقولك ليه؟ لأنك ساعتها هتقبل بأي عمل يتعرض عليك وما تقوليش أنك مش لاقي تاكل‏,‏ بذمتك أنت عمرك نمت جعان؟ حصاوي‏:‏ حصلت‏:‏ الرجل‏:‏ مرة ولا اتنين يعني مش قاعدة‏,‏ وما دام صحيت تاني يوم ومشيت علي رجليك يبقي ما نمتش جعان‏,‏ لكن في العادة مشكلة الأكل بتتحل حد من الجيران بيديك الأكل بايت‏,‏ تستلف جنيه تشتري بيه ساندويتش فول‏,‏ ربنا بيبعت لك عزومة ما كانتش منتظرها‏.‏ حصاوي‏:‏ والديون اللي عليا؟ الرجل‏:‏ اتسجنت بسببها؟ حصاوي‏:‏ لأ لكن ممكن في يوم أتسجن الرجل‏:‏ ساعتها يبقي ضمنت تلات وجبات في اليوم وما بقاش عليك ديون وفي السجن ممكن يشغلوك ويدوك أجر‏.‏ حصاوي‏:‏ لحد دلوقت ربنا بيسترها‏,‏ لكن فيه بلاد تانية بيحصل فيها مجاعات والناس بتبات فعلا من غير عشا الرجل‏:‏ الأمم المتحدة مش بتتدخل وتبعت لها معونات؟ حصاوي‏:‏ أيوه‏।‏ بس بعد مافيه ناس بتموت من الجوع دا حل. حصاوي‏:‏ الموت حل؟ الرجل‏:‏ هو اللي بيموت بيحس بحاجة؟ ولا بعد الموت فيه مشكلة؟ يدوب مشكلة الدفن ودي مش مشكلة‏..‏ حفرة مترين في نص متر‏.‏ حصاوي‏:‏ أهله بيحسوا وبيحزنوا. الرجل‏:‏ دي مش مشكلة‏,‏ ومع ذلك في يوم في شهر في سنة بينسوا لأن الحي أبقي من الميت‏:‏ والموت كاس وداير ع الجميع يبقي إيه المشكلة؟ حصاوي‏:‏ يعني نسيب الأمور تمشي كده واحنا نقعد نتفرج عليها؟ الرجل‏:‏ دا اللي يطول العمر لأنه بيجنبك الحزن والقلق‏,‏ اللي مقدر هيكون واللي تخاف منه ساعات ما يجيش أحسن منه‏.‏ حصاوي‏:‏ دي سلبية‏,‏ لايمكن الانسان يقعد ساكت متفرج. الرجل‏:‏ مش أنت اللي بتقول فيه مشاكل ومش قادر تحلها؟ حصاوي‏:‏ أيوة. الرجل‏:‏ ومش أنت بتقول لازم نفكر‏.‏ حصاوي‏:‏ أيوة . الرجل‏:‏ ومش أنت بعد ما بتقول كده مش بتفكر‏,‏ بدليل أنك مش لاقي حل؟ حصاوي‏:‏‘أيوه . الرجل‏:‏ وأنا عايز أريحك أبقي غلطت؟ حصاوي‏:‏ معني كلامك ده أني أروح أموت لأن ده أحسن حل . الرجل‏:‏ هاهاي‏,‏ وأنت فاكر أنك عايش؟ ‏(‏حصاوي يغشي عليه في الحال‏)(‏ ستار‏)‏

abdel_rahman

مشاهدة ملفه الشخصي

البحث عن المشاركات التي كتبها abdel_rahman