حصاوي يشرب المر‏

كتب: لينين الرملي

(‏حصاوي بالمقهي وقد التف الكل حول زبون غريب ممسك بصحيفة‏)‏

الغريب‏ : ‏اسمعوا‏..‏ خبر مثير جدا‏.‏

زبون‏1:‏ قول ياسيدي


الغريب‏ (‏ يقرأ‏)‏ :

اكتشاف علمي رائع ‏.‏ أعلن دكتور ياباني أنه عالج‏15‏ ألف مريض

 بأمراض مختلفة عن طريق المياه .

حصاوي‏:‏عالجهم بالميه بس؟ ازاي يعني؟

الغريب‏ : ‏بطرق كتيرة منها مثلا يكلم الميه ويطلب منها تشفي المريض

 أو يكتب كلمات معينة وأدعيةفي ورقة ويحطها في الميه وبعدين المريض يشربها‏.‏

زبون‏ 2: ‏سبحان الله

الغريب‏ :‏ بيقول لك أن الميه بتفرح وتبكي وتضحك وتحب وتتأثر

 بكل الطاقات الروحية والكلمات الطيبةوتنقل معاها لجسم الإنسان

 الطاقات الايجابية اللي فيها  ودي بتعالج الخلايا المريضة في الجسم


من أول البرد لحد السرطان‏.‏

زبون‏3 : ‏يا سلام‏..

‏
زبون‏ 4 :‏ حكمتك يارب‏

زبون‏5 :‏ والميه بتاعتنا سلسبيل‏.‏ بدليل أن اللي بيشربمن ميه النيل لازم يرجع تاني

  حصاوي‏:‏

أيوه ماهو الميه بتاعتنا بتغني للخواجات ‏Take me back to cairo‏ يعني


رجعني القاهرة‏.‏

زبون‏1:‏ فعلا‏.‏ أنا كنت بسمع الغنوة دي زمان في الراديو‏.‏

حصاوي ‏: ‏بس مش غريبة أن مية النيل تغني إنجليزي مع أن الأرض

 عندنا بتتكلم عربي؟ إلا بالحق‏.‏الدكتور الياباني ده مش بيتكلم وبيكتب بالياباني؟

الغريب ‏:‏ أكيد طبعا‏

حصاوي : ‏‏طيب هو الميه بتعرف تفهم وتقرأ ياباني؟

الغريب‏ :‏ معرفش‏.‏ بس مادام بتضحك وتبكي وتحب‏.‏ يبقي جايز بتفهم كل اللغات‏.‏

حصاوي‏ :‏ وجايز الميه في مكوناتها جهاز ترجمة فورية‏.‏

زبون‏ 2:‏ ليه لأ؟ احتمال برضه‏.‏

حصاوي ‏: ‏أو يمكن المعدة هي اللي فيها جهاز ترجمة فورية‏.‏

 وإحنا معداتنا بالذات بتهضم الزلط‏.‏


زبون‏ 3: ‏أنت بتهزر بقي‏.‏

حصاوي ‏: ‏ابدا‏.‏ أنا رأيي الميه مش بتضحك وتبكي وبس‏.‏ وبتحشش كمان‏.‏

زبون‏4: ‏ياجرسون هات لي كوباية ميه‏.

حصاوي ‏: ‏بالتلج ولا بالصودا؟

زبون‏ 5:‏ أدي اللي انت فالح فيه‏.‏ مابناخدش منك غير التريقة‏.‏

الغريب‏: ‏بس خلي بالكم‏ الميه إذا كانت ملوثة هتمرض العيان أكثر‏.‏

حصاوي : تمام‏.‏ يعني لازم تعالجوا الميه الأول عشان تقدر تعالج المريض‏.‏


الغريب‏:‏ بس الأسهل تشربوا ميه معدنية‏.‏


زبون‏  6:‏ هندفع فلوس كمان في الميه؟

حصاوي ‏: (‏ ساخرا‏)‏ امال عايزين تتعالجوا مجانا؟ 

 ياجرسون اللي عايز ميه معدنية نزل له قزازة علي حسابي‏.‏
‏

(‏راح الجميع يشرب وكل منهم يتمتم للماء أو يكتب ورقة 

ويضعها في كوبه قبل أن يشربه‏).‏

حصاوي‏:‏ الحمدلله أنا بشرب المر وأتعودت عليه‏(‏ ينهض‏)‏ ربنا يشفي الجميع‏.‏

زبون‏2 :‏ ماشي بدري ليه يا حصاوي؟

حصاوي‏:‏أنا أفضل أروح أقعد في بيتي وأكلم الحيطة‏.‏

زبون‏3: ‏اشمعني الحيطة؟

حصاوي‏: ‏يمكن تفهم وترد عليا‏!‏ حاكم الميه تشفي كل حاجة إلا العقول الخربانة‏.‏

‏(‏ثم يخطر له خاطر فيهمس للغريب‏)‏ قولي بصراحة أنت بتشتغل تبع شركة مياه معدنية؟

الغريب :‏ كلام في سرك آه ومتشكر أنك ساعدتني‏.‏

‏(‏حصاوي يغشي عليه في الحال‏)‏

الجرسون‏:‏لأ فوق يا أستاذ حصاوي وأدفع تمن الميه المعدنية

 اللي نزلت علي حسابك امسك دي فاتورة بحقهم‏.

حصاوي‏:(‏ يفيق ويضع الفاتورة داخل كوب ماء‏)‏ خد بلها واشرب ميتها



(الجرسون يغشي عليه في الحال‏)‏