حصاوي وزعيم الثوره

(دفع الفضول حصاوى لينزل لميدان التحرير وكان اليوم 23 يوليو وهناك رأى ابن أخيه الشاب يقف أمام لافتة الحزب الناصرى وصورة كبيرة للزعيم فى زيه العسكرى)
حصاوى: انت بتحب عبد الناصر فعلا؟
الشاب: طبعا
حصاوى: ليه؟
الشاب: (بدهشة): ليه؟ (يرتبك لحظة ثم يهرش فى رأسه ليتذكر) حقق القضاء على الإقطاع، القضاء على الاحتكار وسيطرة رأس المال على الحكم، إقامة حياة ديمقراطية سليمة، إقامة عدالة اجتماعية، بناء جيش وطنى قوى.
حصاوى : ( ضاحكا): دا اللى حفظهولك فى المدرسة.

الشاب: يكفى أنه أول حاكم مصرى من أيام الفراعنة.
حصاوى: حاكم بس مش زعيم.. سبقه زعماء كتير.. عرابى ومصطفى كامل ومحمد فريد وسعد زغلول والنحاس ثم أول رئيس جمهورية هو محمد نجيب.
الشاب: يطلع مين محمد نجيب دا؟
حصاوى: أول رئيس جمهورية لمصر بعد الملكية.
الشاب: أنت بتجيب الإشاعات دى منين؟ لازم إذاعة العدو.
حصاوى: يا ابنى أنا عشت المرحلة دى وأنا قدك. صدقنى.
الشاب: وأكذب كلام الجرايد؟ وكتاب التاريخ اللى درسته فى إعدادى؟
حصاوى: ما هى وزارة التربية والتعليم حذفت اسم نجيب من كتبها؟
الشاب: أنت عدو الشعب.. لازم عبدالناصر أممك وعلشان كده بتكرهه وبتحقد عليه.
حصاوى: أنا عمرى ما كان عندى حاجة تتأمم غير صوتى الانتخابى وأمموه.
الشاب: وأنت كتبت فى الامتحان إن نجيب ده أول رئيس؟
حصاوى: لا طبعا كانوا سقطونى ورحت ورا الشمس.
الشاب: (يتشنج ويصرخ بغضب) عرفت إنك ديكتاتور؟ أنت مش مؤمن، عبدالناصر لسه موجود، ادعى ربنا يغفر لك.. ومش ح يغفر لك.
حصاوى: (بخوف) عموما هو ما كانش وحش، اللى حواليه هما اللى كانوا وحشين، منعوه يعمل ديمقراطية.. اعذرنى يابنى أصلى اعتقلت أيام عبدالناصر مدة صغيرة.
الشاب: لازم عملت حاجة تضر بمصلحة الوطن وثورة 23 يوليو المجيدة.
حصاوى : الحقيقة آه.. سمعت نكتة عن عبدالناصر بتقول إن عيله عندهم شاب زيك اختلفوا يدخلوه الهندسة ولا الطب ولا الحقوق والآخر الجد قالهم دخلوه الحربية، ولما يطلع ظابط يشتغل اللى هو عايزه ولو حتى رئيس جمهورية.

الشاب: طب وأنت مالك؟ أنت سمعت النكتة بس.
حصاوى: أصل كان فيه أيامها تهمة اسمها «علم ولم يبلغ». والمصيبة أنى ضحكت وما بلغتش.
الشاب: أنت أكيد من الفلول اللى بتحارب ثورة 25 يناير.

(حصاوى يغشى عليه فى الحال)