حصاوي يؤيد القذافي

(حصاوى جالساً بالمقهى ومازال حواره مع أحد الشباب متصلاً)

حصاوى: أنت مش زعلان على القذافى؟

الشاب: لأ طبعاً.

حصاوى: غريبة.

الشاب: غريبة ليه؟ دا راجل ديكتاتور عمل انقلاب وحكم ليبيا هو وأولاده 42 سنة.

حصاوى: بس محمد حسنين هيكل كتب أن عبدالناصر قال إنه شايف فى القذافى شبابه.

الشاب: مستحيل يكون كتب كده.

حصاوى: مش مصدقنى، ارجع لجريدة الأهرام وقتها ومش معقول يكون هيكل كذاب وبيتبلى على عبدالناصر إللى كان عايش وقرا الكلام دا بنفسه.

الشاب: عبدالناصر حاجة تانية خالص دا زعيم حقيقى وعمل ثورة مش انقلاب.

حصاوى: والقذافى يعتبر زعيم، الجماهير كانت بتطلع تؤيده طول حكمه حسب ما كنا بنشوف وسمى حركته ثورة الفاتح من سبتمبر زى ثورة 23 يوليو، وزيها برضه منع وجود أحزاب فى بلده وزى الميثاق بتاع عبدالناصر، عمل الكتاب الأخضر وكان زيه بيدعو للقومية العربية.

الشاب: عبدالناصر ما قعدش طول عمره فى الحكم.

حصاوى: قعد 18 سنة ومات مالحقش يكمل مدته، كان لسه فاضل له 6 سنين ع الأقل.

الشاب: مين قالك الكلام دا؟

حصاوى: ما هو كان بينزل استفتاء لوحده على الرئاسة. وكان لسه فاضله 6 سنين ع الأقل ويوصل لسن الستين ويطلع معاش.

الشاب: عبدالناصر كان زعيم مش موظف.

حصاوى: مش أنا اللى بقول. فيلم (ناصر 56) اللى عملوه عنه بعدما مات بكتير فيه لقطة بيقول لمراته إنه نفسه لما يطلع معاش ياخدها ويسافروا يتفرجوا ع الدنيا.

الشاب: مالناش دعوة بالأفلام.

حصاوى: عندك حق. مؤكد لو عاش لبعد الستين ماكنش هيسيب الحكم لأنه زى القذافى كان طول عمره ضد الاستسلام.

الشاب: عبدالناصر كان لازم يقعد عشان يحارب إسرائيل والإمبريالية.

حصاوى: والقذافى لحد آخر لحظة بيقول إنه بيحاربهم ونفس الكلام قاله صدام وحافظ الأسد وابنه بشار.

الشاب: هما يقولوا لكن عبدالناصر حاربهم فعلاً.

حصاوى: فعلاً هو الوحيد اللى انتصر على إسرائيل. خلاص اقتنعت بس أنا من باب الاحتياط هفضل مع القذافى وبشار لحد ما يسيبوا الحكم.

الشاب: أنت حر. اتفلق. بالمناسبة هتنتخب مين رئيس جمهورية لمصر؟

حصاوى: الراجل اللى حارب إسرائيل لوحده وانتصر عليها.

الشاب: تقصد مين؟

حصاوى: الراجل اللى نزل علم إسرائيل من فوق سفارتها وحط علم مصر. دا أول انتصار حققناه بعد انتصارات عبدالناصر.

                                      (الشاب يغشى عليه)