حصاوى والفلكى

الجار: يجعلها سنة جديدة علينا وعلى الكل يا رب.

حصاوى: إن شاء الله. دا واحد فلكى قالى طالع العالم العربى هايل.

الجار: قال لك إيه؟

حصاوى: فى سوريا الجولان هتتحرر قريب. بس ما قاليش هتتحرر من مين.

الجار: وإيه كمان؟

حصاوى: إسرائيل هتعترف بتنفيذ عملية اغتيال رئيس لبنان الراحل رفيق الحريرى بعد ضغوط من حزب الله.

الجار: طب وتونس واليمن وليبيا والكويت والعراق وال..

حصاوى: (مقاطعًا) قال لى كل بلاد الربيع العربى نفس مصير السودان.

الجار: يعنى إيه؟

حصاوى: يعنى كل بلد هتتقسم لتلات دول ورؤساؤهم هينفدوا من المحكمة الجنائية الدولية لما يوقفوا الحرب عشان ياخدوا جايزة نوبل للسلام وبكدا عدد الدول فى الجامعة العربية يزيد ويبقى فيه أمل نعيد فتح أسبانيا ونرجع دولة الأندلس.

الجار: قبل ما نحرر فلسطين؟

حصاوى: قالى الاتحاد الأوروبى هيعلن عدم شرعية هجرة اليهود إلى فلسطين مقابل اعتراف المسلمين بعدم شرعية هجرتهم إلى أوروبا. ومفاوضات بين مصر وإمارة حماس الإسلامية عشان يعترفوا بأن سيناء أرض مصرية.

الجار: أيوه خلينا فى مصر.

حصاوى: قالى المصريين هيعيدوا كتابة وصف مصر الحديثة.

الجار: معقولة؟

حصاوى: هو ما قاليش إمتى.

الجار: طب وثورة 25 يناير.

حصاوى: هيتم الكشف عن الطرف الثالث اللى دايمًا بيقتل الثوار فى وقت مبكر جدّا.
يعنى أوائل القرن اللى جاى.

الجار: ومين هيبقى رئيس مجلس الشعب؟

حصاوى: واحد اسمه ابن المهلهل وهيقر قانون باعتماد إعانة 50 ألف جنيه للهجرة الشرعية من مصر و100 ألف للهجرة غير الشرعية تشجيعًا للشباب على مستقبل أفضل. ومجلس الشورى هيقرر السنة اللى جاية ليلة 31 ديسمبر قبل الساعة ما تيجى 12 يتم تأخير الساعة لمدة كام سنة.

الجار: هو دا كل اللى يعرفه؟

حصاوى: لا قالى كتير بس دا كل اللى أقدر أقوله.

الجار: وهو أنت قلت حاجة.

حصاوى: وانت صدقت إنى حصاوى بجد عشان أقولك كل حاجة؟

الجار: إنت باين عليك سكرت فى راس السنة أنت والفلكى دا ولسه ما فوقتش.

حصاوى: أبدًا دا راجل محترم ما شربش أى منكر.
سألته: هى السنة الجديدة جاية فعلاً؟ ولا مفروض إحنا اللى نروح لها؟ قالى أدينا قاعدين لحد ما نشوف.

الجار: لا، يبقى راجل عاقل فعلاً.

حصاوى: مؤكد ما هو كان محشش.

                                        (الجار يغشى عليه)