حصـاوي الجبـان‏

‏ 
(أصيب المواطن حسن حصاوي بغيبوبة لعدة سنوات وأفاق فلم ييفهم ما حوله‏)‏
‏
‏(‏ عاد حصاوي لجلسته في المقهي مع الزبائن‏)‏

حصاوي:  أنتم لما قولتوا لي اللي حصل وأنا مغمي عليا الست شهور اللي فاتت خبيتم عليا حاجة مهمة‏.‏

زبون‏1‏ :  إيه هي؟

حصاوي  : الكورة‏.‏ إيه اللي حصل في الدوري‏.‏ وفي ماتش الأهلي والزمالك؟

زبون‏ 2‏:  ماحصلش‏.‏ الماتش خلص صفر صفر‏.‏ والأهلي هو الأول زي العادة‏.‏

حصاوي :  الحمد لله‏.‏ أصلي مابحبش قطع العادة‏.‏

زبون‏3‏ :  بالحق أنت أهلاوي ولا زملكاوي يا حصاوي؟

حصاوي :  أنا ماليش في الكورة أساسا‏. ‏بس بحب أسمع مناقشات وخناقات المشجعين مع بعض‏.‏ ساعتها بحس أن بلدنا بخير وفيها حرية رأي وديموقراطية والأقليات زي الفرق الصغيرة لها صوت وبتشارك في اللعب‏.‏

زبون‏4‏ :  بمناسبة حرية الرأي والديمقراطية أنا شايف يا أخواني أن‏..‏

زبون‏5 : (‏ مقاطعا في الحال‏)‏ أنا بقي مختلف معاك وشايف العكس تماما‏..‏

‏(‏تدخل ثالث مقاطعا وسرعان ما اشتبك الكل في نقاش بصوت عال‏)‏
‏(‏وفجأة تخطي ميكروباس سريع إشارة المرور ودخل المقهي فحطم زجاجها وأصاب بعض الجالسين وطرحها أرضا لكن النقاش لم يتوقف لحظة‏)‏
‏(‏ونال الجرسون فنجان شاي للسائق من النافذة فتراجع بالسيارة وخرج‏).‏

حصاوي : ‏(‏ يقف منزعجا‏)‏ بلغوا الإسعاف بسرعة‏.‏

‏(‏لكن النقاش استمر ولم يرد عليه إلا الجرسون‏)‏

الجرسون  : الإسعاف بتتأخر‏.‏ الصيدلية اللي جنبنا ممكن تلحقهم بكام قرص فياجرا من اللي متهربة‏.‏

‏(‏والتفت متولي وهو يمسح حذاء أحد الزبائن‏)‏

متولي  : وليه؟ المطافي قريبة مننا‏.‏ أوصل بلغهم‏.‏ ولو ما لقتش حد منهم هات خرطوم ميه في أيدك وتعالي‏.‏

حصاوي  : بس ماحصلش حريقة عشان نطفيها‏.‏

الجرسون  : جايز تحصل بكرة‏.‏ يبقي عندنا خرطوم احتياطي‏.‏ واهو نرش بيه القهوة لحد ما تحصل‏.‏ بالحق أنت حصلت لك إصابة ياسي حصاوي؟

حصاوي:  لأ بس فنجان القهوة أنكسر والقهوة أدلقت علي هدومي‏.‏

الجرسون :  فداك‏.‏ القهوة بجنيه وحق الفنجان خمسة جنيه‏.‏ هتدفع ولا أقيدهم ع النوتة؟

‏(‏وفجأة سكت كل المتناقشين والتفتوا لحصاوي‏)‏

زبون1‏ : مالك يا حصاوي‏.‏ مش بتشترك معانا في المناقشة ليه؟

حصاوي :  أنا ماليش في السياسة‏.‏ مش هتعملوا حاجة للمصابين دول؟

زبون  : ما تحملش همهم‏.‏ دول هيتعالجوا علي نفقة الدولة وأهاليهم هيأخدوا تعويض بعد ما يموتوا‏.‏ما تغيرش الموضوع‏.‏ مالكش في السياسة ليه؟

حصاوي :  أنا زي أغلب الناس اللي بتفكر في أكل عيشها وما عندهاش وقت تتكلم في السياسة‏.‏

زبون‏3‏ : دا كان زمان قبل ما يغمي عليك‏.‏ دلوقت كل الناس من أصغر تلميذ في إبتدائي لحد العواجيز اللي دخلوا ع التسعين بيتكلموا في السياسة‏.‏

زبون‏ 4‏ : وإن شاء الله فيه قانون جديد هيطلع يمنع حبس أي حد مهما قال أو كذب أو شتم جدود اي شخص مهما يكون‏.‏

زبون‏ 5‏ : يعني دلوقت تقدر تتكلم وتقول رأيك في الحكومة بكل صراحة‏.‏

 زبون 1: ولا أنت مع الحكومة يا حصاوي؟

حصاوي :  لأ‏.‏ أنا ما قلتش كده‏.‏

زبون‏2‏: يبقي تلاقيك لسه خايف ومش مصدق أن فيه حرية رأي‏.‏

حصاوي :  أنا معترف أني خايف مش بنكر بس‏..‏

زبون‏3 : (‏ مقاطعا‏)‏ أنت شفت حد فينا بيدافع عن الحكومة؟

حصاوي :  الحقيقة لأ‏.‏ بس‏..‏

زبون‏4‏ : أنت مش سامعنا كلنا بنعارض الحكومة؟

حصاوي ايوه‏.‏ بس‏..‏

زبون‏5‏ : طيب‏.‏ تبقي خايف من الحكومة ليه؟

حصاوي :  مش خايف من الحكومة‏.‏ أنا خايف لأن من اللي بسمعه وبشوفه بيتهيأ لي أن مافيش حكومة‏!‏

زبون‏2‏ : وأنت عايز حكومة تعمل بيها إيه؟

زبون‏3‏ : أنت موضة قديمة يا حصاوي؟

زبون‏4‏ : أنت رجعي يا حصاوي؟

زبون‏5‏ : أنت متخلف يا حصاوي؟

متولي : أنت حمار يا حصاوي؟

‏(‏حصاوي يغشي عليه في الحال‏)‏